المتجر الأونلاين

من غير ما تدخّل أي حاجة مرتين: المتجر بياخد الأصناف والأسعار والمخزون من البرنامج. تشاركه على فيسبوك وإنستجرام وواتساب، والزبون يطلب.

تفتح متجرك إزاي

1. من «المتجر الأونلاين» اختار اسم متجرك (مثلاً elnour يبقى elnour.muhasebi.com).
2. ارفع اللوجو وصورة الغلاف واختار لون المتجر.
3. اكتب رقم الواتساب والعنوان والمواعيد.
4. اختار «الطلبات توصل البرنامج» (أو «واتساب بس»)، وحدد الاستلام والتوصيل ومناطقه ومصاريفها وطرق الدفع.
5. احفظ، وانسخ اللينك أو اطبع الكود.

اللي الزبون بيشوفه

• اختار موبايلك: الماركة ثم الموديل، ويظهر له كل حاجة بتركب على موبايله.
• الأقسام والبحث بالعربي (أ/ا، ة/ه، ى/ي مش بتفرق).
• صفحة الصنف: الصور، الأنواع (لون، مقاس، جودة)، السعر، متوفر ولا خلص، والموبايلات اللي بيركب عليها.
• الطلب: الزبون يكتب اسمه ورقمه، يختار استلام من المحل أو توصيل لمنطقته، ويدفع كاش عند الاستلام أو تحويل InstaPay / محفظة ويرفع صورة التحويل.
• متابعة الطلب: بعد الطلب بتفتح له صفحة فيها رقم الطلب وحالته أول بأول، وزرار يكلّمك على واتساب.

الطلبات عندك في البرنامج

1. الطلب الجديد بيوصلك إشعار، ويظهر في «طلبات المتجر».
2. كلّم الزبون وأكّد، وبعدين «بيتجهّز» ثم «خرج للتوصيل» أو «جاهز للاستلام». ولكل حالة رسالة واتساب جاهزة للزبون.
3. لما يتسلّم، دوس «حوّل لفاتورة»: الكاشير بيفتح بالأصناف بسعر الطلب وبيانات الزبون، والمخزون والدرج بيتسجلوا عادي، ومصاريف التوصيل بتدخل الدرج كاش.
4. لو هتلغي الطلب اكتب السبب، والزبون بيشوفه في صفحة الطلب.

حجز صيانة من المتجر

لو عندك موديول الصيانة، فعّل «احجز صيانة»: الزبون يكتب جهازه والمشكلة واليوم اللي جاي فيه، والحجز يوصلك إشعار في «حجوزات الصيانة». كلّمه واتساب، ولما الجهاز يوصل دوس «اعمل تذكرة»: استلام الجهاز بيفتح ببيانات الزبون والجهاز والمشكلة، والحجز بيتقفل مع التذكرة.

دومين خاص بيك

عندك دومين زي www.elnour-mobile.com؟ اكتبه في «المتجر الأونلاين»، وضيف السجلين اللي بيظهرولك عند الشركة اللي حاجز منها الدومين (سجل TXT يثبت إنه بتاعك وسجل CNAME يوصّله بالمتجر)، ودوس «اتأكد». المتجر هيفتح على دومينك بشهادة أمان، واللينك القديم بيوديهم عليه لوحده.

أكواد الخصم

اعمل كود (مثلاً RAMADAN10) بنسبة أو مبلغ، بحد أقصى للخصم وأقل طلب ومدة وعدد مرات، ومرة واحدة لكل رقم لو حابب. الزبون يكتبه في السلة والخصم بيتحسب عندنا، ولما تحوّل الطلب لفاتورة الخصم بيتحط لوحده، حتى لو الكاشير ملوش صلاحية خصم. الطلب الملغي بيرجّع استخدام الكود.

فيسبوك وإنستجرام وجوجل

في صفحة «المتجر الأونلاين» هتلاقي «لينك الأصناف»: ملف بكل أصنافك بالصور والأسعار والتوفر بالشكل اللي فيسبوك وجوجل بيفهموه. تحطه مرة واحدة، والأسعار والمخزون بيتحدثوا لوحدهم كل كام ساعة.

1. فيسبوك وإنستجرام: Commerce Manager ← الكتالوج ← مصادر البيانات ← Data feed ← Scheduled feed، والصق اللينك. بعدها تقدر تعمل Shop على الصفحة وتعلّم الأصناف في البوستات.
2. جوجل: Merchant Center ← المنتجات ← Feeds ← Scheduled fetch، والصق اللينك؛ أصنافك تظهر في جوجل شوبنج.

وتقرير «المتجر الأونلاين» في التقارير بيقولك كام طلب جالك، كام منهم اتحول لفاتورة، والمبيعات ومصاريف التوصيل، وأكتر الأصناف والمناطق طلباً.

الأصناف والصور

• كل الأصناف الشغالة بتظهر، وتقدر تخفي أي صنف من صفحته («يظهر في المتجر الأونلاين»).
• السعر هو «سعر الأونلاين» لو حاطه، وإلا سعر القطاعي.
• ارفع لحد 8 صور للصنف من صفحته، والأولى هي الغلاف. البرنامج بيصغّرها لوحده.
• المتجر بيعرض «متوفر / قرّب يخلص / خلص» من مخزون الفرع اللي تختاره، والعدد بس لو فتحته.

شكّل متجرك

• اعرض الأسعار: لو قفلتها، كل صنف مكتوب عليه «اسأل عن السعر» والزبون يسألك على واتساب.
• «اختار موبايلك» و«وصل جديد» وزراير واتساب: تظهر أو تختفي.
• شريط إعلان فوق كل صفحات المتجر، مثلاً «توصيل ببلاش فوق 500 ج».
• أسامي الأقسام: القسم يظهر للزبون باسم غير اسمه في البرنامج لو حابب، والماركة تظهر أو تختفي.
• مواعيد الطلبات: مثلاً من 10 الصبح لـ 2 بالليل؛ برة المواعيد الزبون يتصفّح والسلة تتحفظ لحد ما يطلب.